| |
| |
Vespers antiphon 1
|
Gratulemur in honore
catharine virginis
que divino plena rore
non curans propaginis
tota mentis in ardore
sprevit culpam criminis
|
Vespers antiphon 2
|
Opes mentis preelegit
quibus totam se subegit
sub carnis victoria
nexus mundi fortis fregit
nec cum mundo quidquam egit
mundi carens gloria
|
Vespers antiphon 3
|
Virgo prudens anhelavit
ad sedem sideream
ubi locum preparavit
linquens orbis aream
granum sibi reservavit
ventilando paleam
|
Vespers antiphon 4
|
Disciplinis et imbuta
puella celestibus
nuda nudum est secuta
certis christum passibus
dum mundanis est exuta
vacuis honoribus
|
Vespers antiphon 5
|
Virgo deo decorata
fidei signaculo
et in monte collocata
divino miraculo
nos expellas vita grata
mortis ab umbraculo
ut in summi sit purgata
regis habitaculo
|
Vespers (gospel) special antiphon
|
Decoretur dies ista
devotis obsequiis
sic vox sonet ut mens clamet
internis preconiis
dum beate catharine
detenti sollemniis
promoveri flagitamus
eius patrociniis
|
| |
Matins I
|
Regi summo iubilemus
in triumphis virginum
quem in choris coronata
beatorum agminum
laudat virgo catharina
dominorum dominum
|
Matins antiphon 1
|
Generosi catharina
stirpe ducta sanguinis
sic regalis est sortita
seriem propaginis
ut in illa memor esset
celestis originis
|
Matins antiphon 2
|
Illa nihil amplexata
de parentum opibus
disciplinis est imbuta
primo secularibus
tuis christe meditata
tandem in sermonibus
|
Matins antiphon 3
|
Dum profanis immolaret
idolis maxencius
ad conspectum virgo regis
prorumpens audencius
diligenter explanavit
quid esset salubrius
|
Matins respons 1
|
Cum dominante manu
premeret maxencius orbem
urbs ab alexandri
que sumpsit nomine nomen
martyrii didicit
catharine sanguine formam
|
Matins verse 1
|
Urbs provecta sue
meritis et dogmate civis
|
Matins respons 2
|
Hec vere fidei
sacris edocta magistris
audet cesaree
sectam subvertere legis
cum metus omne genu
curvaret ad idola regis
|
Matins verse 2
|
Nec vicium proprie
virgo sapit unica gentis
|
Matins respons 3
|
Rex decies quinos
iubet adventare sophistas
discutitur verum
docte catharina perorat
illi martyrii
pariter sumpsere coronas
|
Matins verse 3
|
Sic infirma deus
recipis sic forcia frangis
|
Matins antiphon 4
|
Non est inquit racionis
plures deos colere
nec in turbam deitatem
simplicem distrahere
sive cultum creatoris
creatis impendere
|
Matins antiphon 5
|
Ad conflictum provocati
quinquaginta rhetores
a puella superati
facti sunt mediocres
mox a deo decorantur
deorum immemores
|
Matins antiphon 6
|
Virgo fame tenuata
victu sacro pascitur
rotis quoque destinata
celitus eripitur
et adversus sevientes
ubique consulitur
|
Matins respons 4
|
Ergo bis senis
virgo veneranda diebus
carceris horrori
committitur indiga victus
celicus adveniens
reficit ieiunia pastus
|
Matins verse 4
|
Disponit clause
panis bona prandia vivus
|
Matins respons 5
|
Virginis exicio
fit machina seva rotarum
angelico pulsu
perit ingens turba virorum
sic non imminuit
corpus mala fabrica sanctum
|
Matins verse 5
|
Ut quondam pueris
fornax chaldea pepercit
|
Matins respons 6
|
Quam tua distribuis
occulte dona redemptor
principe cecato
lumen sua suscipit uxor
saucia regine
grassatur ad ubera tortor
|
Matins verse 6
|
Sic regem spoliat
sic sancta virgo triumphat
|
Matins antiphon 7
|
Regis uxor acquiescit
puelle consilio
fide plena mortem subit
sequente porphyrio
regna terre pro celesti
commutant palacio
|
Matins antiphon 8
|
Tandem cursu consummato
christo virgo redditur
et lictori mancipata
ferrum cervix patitur
lac pudoris argumentum
pro cruore funditur
|
Matins antiphon 9
|
Angelorum dei nutu
sacer chorus adfuit
et minister sepulture
sina montem tenuit
iugi lapsu de sepulchro
liquor pacis effluit
|
Matins respons 7
|
Rex graviter passus
molimina vana perire
virgineam litem
statuit prescindere morte
fortiter abiecta
felix cadit hostia carne
|
Matins verse 7
|
Emerite bravio
minime fraudata corone
|
Matins respons 8
|
Candida cum sevo
cervix procumberet ictu
disponente deo
patuit res digna relatu
lacte sacro vulnus
nituit pre sanguinis haustu
|
Matins verse 8
|
Candorem mentis
signat perfusio lactis
|
Matins respons 9
|
Dum bene siderea
frueretur spiritus arce
glorificat caram
memorando christus honore
sistitur in sinai
sancto dignissima monte
|
Matins verse 9
|
Cuius tumba sacrum
fluxu largitur olivum
|
| |
Lauds antiphon 1
|
Plebs fidelis hoc sollemne
devote suscipiat
et in laudes catharine
virginis proficiat
que nos summe maiestati
benigne conciliat
|
Lauds antiphon 2
|
Dum offerret sue carnis
virgo sacrificium
manus mundas ad celeste
pandens sanctuarium
preces fudit interpellans
pro salute gencium
|
Lauds antiphon 3
|
Hanc ancillam tuam christe
prevenito gracia
ut te deum invocemus
cum eius memoria
in adversis liberatrix
visitet potencia
|
Lauds antiphon 4
|
Vox de celis in turbarum
est audita medio
qua benigne confirmatur
indulta peticio
ergo votis insistamus
iam certi de premio
|
Lauds antiphon 5
|
Dum in sancta catharina
iesu christe coleris
memor esto verbi tui
memor esto muneris
quod oranti contulisti
spes humani generis
|
Lauds (gospel) special antiphon
|
Benedicta sit immensa
sempiterna trinitas
quam cognovit inter gentes
catharina perditas
quod nec sexus nec etatis
amovit fragilitas
sed honore passionis
est usa virginitas
|
| |
2nd Vespers (gospel) special antiphon
|
Veneranda catharina
probatique meriti
cleri tui recordare
populi+que subditi
ut qui lege peccatorum
tenemur suppositi
te iuvante solidemur
virtute paracleti
|
| |
Vespers antiphon .a2
|
Pulchritudo virginea
columba christi nitida
nos catharina servulos
fac humiles et splendidos
|
Vespers antiphon .a3
|
Post plurima supplicia
martyr alma catharina
ad decollandum est ducta
ad celum tendens oculos
collum summittit gladio
orans dat gloriam deo
|
Vespers antiphon .a4
|
Expecto pro te gladium
in paradiso spiritum
colloca pacatissimum
et fac misericordiam
meam agentibus memoriam
|
| |
Lauds (gospel) special antiphon .a1
|
Benedictus dominus
qui mirificavit
signis mirabilibus
dilectam quam amavit
catharinam virginem
eam visitando
et carceris caliginem
lumine vocando
in ipsa signum gracie
amplius illuxit
cum lac pudicicie
pro sanguine effluxit
de hac fluens oleum
signum pietatis
quod turbis est fidelium
causa sanitatis
exauditur propere
bonitate christi
dum affatur libere
tene quod petisti
in perenni gaudio
deum contemplando
ibique absque termino
sanctis corregnando
|
| |
2nd Vespers respons .a1
|
Salve predigna
mitis castaque benigna
mortis a ruina
nos defende catharina
|
2nd Vespers verse .a1
|
Sponsa deo grata
super astra deducta beata
|
full office name: