full office name: MONULPHUS & GONDULPHUS (n1)
edition: AH 28 #26
calendar:July 16
structure summary: Vespers: ARE
Matins: secular
Lauds: A5E
2nd Vespers: E
poetic forms: Vespers: v{v}.o
Matins: s.v3{vp3}v3{vp,vp,vh}v3{vp3}
Lauds: v5.v
2nd Vespers: .o [”q]
type of saint: bishop
geographical information:Tongres, Belgium
notes:bishop
Persons: Monulphus Gondulphus
Places: Ledgia

By clicking on the icon you can search for offices within the corresponding category.

Here you find the raw text from the LMLO file

 
 
Vespers antiphon
Gaudeamus et celestis
iubili preconia
imitemur in his festis
concordi leticia
quibus nobis sunt laudanda
domini magnalia
et sanctorum imploranda
presulum suffragia
Vespers respons
Immortali seculorum
regi laus et gloria
in sanctorum confessorum
promatur memoria
quos dilexit nam paterna
munitos custodia
die vexit hodierna
ad celi fastigia
Vespers verse
Quorum rexit ut interna
paracleti gracia
Vespers (gospel) special antiphon
Magnificet ecclesia
regem magnificencia
christum qui spes est unica
sanctorum quos mirifica
hic insignitos gracia
perduxit ad celestia
 
Matins I
Ad christi preconium
invitetur hodie
conventus fidelium
congaudendo glorie
beatorum presulum
qua gaudent in seculum
Matins antiphon 1
Non in via peccatorum
pes eorum substitit
sed in lege mandatorum
dei iugis extitit
illis meditacio
actus cum eloquio
Matins antiphon 2
In virtutum stabiliti
monte transitoria
conculcarunt eruditi
vera sapiencia
unde nunc celestia
possident cum gloria
Matins antiphon 3
Vox eorum pro commissa
plebe fusa iugiter
apud ipsum est admissa
qui est efficaciter
iustis exultacio
salus benediccio
Matins respons 1
Recolatur hec decenter
presulum festivitas
quos bearunt precellenter
fides spes et caritas
Matins verse 1
Beati omnes qui timent dominum qui ambulant in viis eius
Matins respons 2
Normam sequens sanctitatis
monulphus attollitur
et at culmen dignitatis
presulatus rapitur
Matins verse 2
Ecce sacerdos magnus qui in diebus suis placuit deo
Matins respons 3
Ortus mundo generosis
gondulphus natalibus
apud christum numerosis
effulsit virtutibus
Matins verse 3
Quoniam prevenisti eum domine in benediccionibus dulcedinis
Matins antiphon 4
Tuam christe perfecisti
laudem ex operibus
horum quos constituisti
tuis duces gregibus
quos transvexit sanctitas
maris huius semitas
Matins antiphon 5
Prepotenter conservati
hostis ab insultibus
vias vite sunt sectati
inoffensis gressibus
quibus nunc est visio
dei delectacio
Matins antiphon 6
Deo vero servierunt
puris ex affectibus
montem cuius ascenderunt
innocentes manibus
penetrantes hodie
portas regis glorie
Matins respons 4
Hi in domo dei clarum
velut duo sidera
iubar dantes tenebrarum
effugarunt opera
Matins verse 4
Custodiebant testimonia eius et preceptum quod dedit illis
Matins respons 5
Locum forte pertransivit
monulphus qua ledgia
nunc est pandens que prescivit
prophetali gracia
locus inquit hic reddetur
summis civitatibus
par post sanctum qui nascetur
posteris temporibus
Matins verse 5
Hic accipiet benediccionem a domino et misericordiam a deo salutari suo
Matins respons 6
Sublimatus in pastorem
gondulphus sollicite
curam gessit et amorem
plebis sibi subdite
Matins verse 6
Et pavit eos in innocencia cordis sui
Matins antiphon 7
Hi sunt quibus intellectum
lux superna prebuit
quos instruxit et per rectum
ducens iter statuit
in locis fiducie
opulenta requie
Matins antiphon 8
Exultare decet rectos
christo cuius opera
mira suos per electos
qui ab arce supera
hos vidit pontifices
virtutum opifices
Matins antiphon 9
Istos deus elegisti
tua tibi gracia
habitare quos fecisti
intra sion atria
hymnos ubi melice
turme promunt celice
Matins respons 7
Hi sagaces erogare
triticum in tempore
meruerunt reportare
talentum cum fenore
Matins verse 7
Venientes autem venient cum exultacione portantes manipulos suos
Matins respons 8
Se pro fide murum dando
monulphus hereticam
vicit pestem conservando
vineam dominicam
Matins verse 8
Beatus homo quem tu erudieris domine et de lege tua docueris eum
Matins respons 9
Zelo fervens caritatis
gondulphus gentilibus
lucem dedit veritatis
divinis dogmatibus
Matins verse 9
Os iusti meditabitur sapienciam et lingua eius loquetur iudicium lex dei eius in corde ipsius
 
Lauds antiphon 1
Dum monulphus tumulatum
principem progreditur
voces diras ululatum
audit et prosternitur
Lauds antiphon 2
Astat vultus vir preclari
dicens pater optime
surge stude suffragari
pereunti anime
!Preclari [alt: ?]
Lauds antiphon 3
Redit presul et placatur
precum beneficio
deus princeps liberatur
mortis a supplicio
Lauds antiphon 4
A mundana segregavit
se gondulphus turbine
et de vera pregustavit
domini dulcedine
Lauds antiphon 5
Expectavit vigilando
venturum a nupciis
quem supernis exultando
spectat in deliciis
Lauds (gospel) special antiphon
Hi sunt columne stabiles
precones iusticie
vita digne laudabiles
lampades ecclesie
quos merito non impares
dies hec terrestribus
exutos fecit compares
supernorum cetibus
 
2nd Vespers (gospel) special antiphon
O sacerdotes incliti
virtutum dono prediti
o clara celi lumina
ut paradisi flumina
irrigastis ecclesie
hortum regem iusticie
christum placate precibus
ut nos a malis omnibus
servans nobis celestia
det post hec mundi tedia